毛毛就嚟12歲喇！

2020年3月10日(星期二)

下星期一就係毛毛12歲生日，以前一早就諗定點樣幫毛毛慶祝生日⋯

到今日⋯自己唔十分願意，因為不知不覺間又過咗一年，總係覺得時間好無情咁一直向前走⋯好多開心、傷心嘅事情、事物都唔可以停留⋯⋯

毛毛，生日快樂啊！

2019年3月16日（星期六）

今日係我家最愛鍚嘅毛毛十一歲生日......

原來毛毛同我哋生活咗十一年，自己仲係停留喺嗰種感覺⋯噚日毛媽接咗隻黑色BB狗（後來變成灰色嘅毛毛）返屋企，我夜晚放工返到屋企見到毛毛令我非常驚喜（點解隻狗狗係黑色？）⋯⋯好難相信時間係過得咁快⋯⋯

毛爸毛媽：毛毛，祝你生日快樂、身體健康、幸福平安、快樂成長、衣食無憂⋯⋯

生日快樂

身體健康

幸福平安

快樂成長

衣食無憂

毛毛嘅改變係唔係正常？

2019年3月12日(星期二)

自從(2018年3月1日)小狄狄成為毛家家庭成員之後…毛毛行為上有好明顯嘅改變，毛毛對家人特別熱情、好聽話、好有紀律……。

直到最近毛毛有另一種改變…愛瞓覺(比平日瞓得更長時間) 、經常發脾氣、仲會咬人(以前好少會咬人)……。

有朋友話狗狗年紀大咗脾性多多少少都會有啲改變，但我心想毛毛咁嘅改變係唔係正常呢？

毛毛冇改變嘅係「開心表情嘅樣」

毛毛體力走下坡了⋯

2018年10月20日（星期六）

毛毛每星期日都洗白白一次，已往毛毛沖涼程序⋯沖身、過洗毛精、過水、敷泥、沖身過水、風機吹乾毛⋯閒閒地兩個小時。

近年發現毛毛已經冇耐力堅持企兩個小時，每次沖完涼都表現好勞累，要瞓覺休息一段時間，毛毛年紀大了⋯⋯

毛毛：宜家仲好...可以慢慢嘆...

做咗大哥哥嘅毛毛

2018年10月11日（星期四）

自從狄狄加入毛家，毛毛行為上慢慢咁變化，變得更乖更聽話更有紀律，家人都估唔到。

例如⋯家人食午、晚飯毛毛就會自覺走番入籠（以往毛毛會喺枱邊討食唔肯入籠要夾硬捉佢放入籠），玩玩具時間完會自動交還玩具（狄狄就唔會交仲會擔住玩具通屋勁跑捉都捉唔住佢），毛毛自己最鍾意嘅玩具都會讓狄狄玩，毛毛食餐會包容狄狄食自己兜糧而唔打交⋯⋯

家人對毛、狄兩兄弟嘅行為評價好極端⋯毛毛越來越乖，狄狄越大越失控⋯⋯

家人俾以前更愛錫毛毛...

肯定⋯毛毛係乖寶寶

2018年4月12日（星期四）

狄狄嚟到余家已經6個星期六，家人互相之間毛媽、毛毛、家務助理⋯都產生好多磨擦，呢個情況令我出乎意料之外。

毛毛嘅行為亦都好大變化，變得更乖巧更聽話，以往要用指令提醒毛毛嘅事⋯現在嘅毛毛變得自動自覺⋯照紅外線燈、裝身、抹身、洗腳、吹乾⋯⋯等都非常合作，行為更有規律，家人好肯定毛毛係超級乖仔（現在有咗狄狄做比較更顯得毛毛自律），更對毛毛大少寵愛有加...

有比較先覺毛毛係超級乖...叻寶寶

令毛毛受驚了...

2018年4月12日(星期四)

2018年4月3日（星期三）狄狄越來越反叛，經常亂跳、亂跑、橫衝直撞而且極高速，實情係狄狄百厭活潑，無時無刻要同毛毛玩，挑戰毛毛大哥地位，而毛毛就忍受唔到狄狄不斷嘅纒繞好不耐煩咁狐吠狄狄。

為阻止狄狄過火嘅行為，所以家人對狄狄時時大聲發出指令、警告、甚至用報紙棒來威嚇⋯要狄狄停止百厭行為。

但係⋯咁亦都產生連鎖反應，同時連累毛毛都無孤受驚，家人亦都發覺毛毛唔多願意同狄狄交朋友⋯經常瞓喺角落悶悶不樂。

毛毛：毛爸好惡好大聲鬧狄狄...連我都驚驚

特別嘅日子⋯毛毛生日

2018年3月16日（星期五）

三月十六日⋯係一個令毛家開心又憂心嘅日子，毛毛10歲生日。

毛爸毛媽：祝毛毛身體健康、活潑百厭、開開心心、生日快樂！十年時間對狗狗就等於佢哋生命嘅四份之三。

現時令毛家開心嘅係⋯毛毛仲健健康康、食得瞓得、百厭唔聽話活潑聰明嘅小朋友，感恩。

今日令毛家憂心嘅係⋯毛毛仲可以陪伴我哋幾多時間？有咁嘅憂慮係因為我哋好貪心。

無論將來係點，往後嘅日子我哋會更珍惜更愛錫毛毛。

生日快樂啊毛毛！

毛毛生日快樂！我哋愛你...

毛毛向司機拜年

2018年2月17日(星期六)

今早(5：50分)帶毛毛落街散步，天色白茫茫灰灰暗...

我同毛毛行經隔離地盤停車場...突然同暗處行出嚟嘅司機叔叔相遇，我哋相方都嚇一跳，毛毛更加驚到狂吠對方：旺旺旺旺旺旺...

我連忙向叔叔道歉：對唔住對唔住...

叔叔雖然驚魂未定...但反應出人意表...

叔叔：唔緊要，冇事冇事，佢(狗狗)同我拜年啫...旺旺旺...一早就旺旺旺...今年我一定好旺...哈哈哈。

好彩大家冇事，叔叔就好開心咁行開咗...(搞到我都O咀...哈哈哈)

毛爸：毛毛，新年期間就唔好亂咁吠人...聽話喇。

毛毛：我冇呀！我同佢哋拜年咋：旺旺旺、旺旺旺。

期待時刻

2018年2月9日(星期五)

過去嘅十日氣溫一直攝氏10度以下...毛毛早晚落街散步都要著衫，平日毛毛對要 "著衫"已成習慣，仲非常合作。

近日毛毛對著衫有反常表現...每當裝身去散步時刻就會爆發 "追逐戰"，而我感覺上毛毛喺追逐中玩得好開心同唔願意著衫。我想咗好多可能性...我估件衫有少少緊身同唔舒服...因為毛毛肥咗...

平日我攞起件衫毛毛就會好興奮自覺咁行過嚟...

毛毛換完衫之後就會坐定定等落街...

毛毛驚嚇嘅歡迎方式

2018年2月4日(星期日)

過去一星期天氣寒冷...毛毛活躍嘅行為都靜咗。

話說有日我放工返屋企...發覺屋內好靜無聲(好奇怪)，因為平日我放工只係行到大門口...屋入面毛毛就會狂吠同行為失控。

今日點解咁靜？當我開門...就俾地面一座「黑色團狀」嘅物體嚇嚫...

開燈睇清楚...情況令我笑翻，原來係可愛嘅毛毛企喺度歡迎我....

原來縷住被嘅毛毛企定定歡迎我...㨾子嚇人又可愛...

極寒、4.6度

2018年2月1日（星期四）

聽天文台講⋯今日氣溫只有4.6度，係入冬以來最凍。

雖然毛毛好期待每日落街散步，天氣變化亦唔會左右到毛毛，但今早同傍晚毛毛除咗食餐之外都表現好唔願意走動。

我相信天氣實在太大風、太凍⋯莫講人唔想走動連狗狗走係。

毛毛裝完身情願走去瞓覺都唔想落街散步...

放空眼神嘅毛毛

2018年1月21日(星期日)

每逢我哋放假...毛毛嘅行為就會變得懶洋洋同好安心，對圓碌碌眼仔好似監視住我哋咁，當日又會瞓得特別甜同特別耐...毛毛會表現出嗰種安逸嘅感覺...真係令我哋好羨慕。

毛毛望住人嘅眼神非常可愛...

十分自動自覺嘅毛毛

2018年1月18日(星期四)

毛毛每日落街散步兩次，每次返到屋企要...抹身、洗腳、吹乾、梳毛。

毛毛以前對衛生梳洗嘅過程非常擴拒，每次散完步返屋企大家就開始角力，毛毛就通屋跑，我哋就周圍追......

唔知由幾時開始嘅改變...毛毛一入門口 (除咗揾毛媽) 自己行入洗手間等除頸帶同梳洗，然後好乖咁行入書房等吹乾腳仔....

毛爸：毛毛好乖仔...好叻...

毛毛：我幾時都咁醒咖啦...

我對「籠」嘅新觀念

2018年1月17日（星期三）

舊年毛毛腰椎痛復發兩次。

毛毛個性係非常活潑又好動⋯勁跑、跳、用雙後腳企高⋯等等，更有好多時因過份熱情而行為失控，所以毛媽有將毛毛不定時咁「困籠」，自己對困籠睇法好負面等於....罰。

有次睇到臺灣訓狗師熊爸嘅一編報道：狗狗由BB開始應該訓練習慣困籠。

我哋將毛毛困籠時候就形做一個好嘅聯想⋯入籠會有零食獎，現時毛毛非常接受，經常自己走入籠休息，由其係食餐前會自動自覺咁走返入籠好乖坐喺度⋯等開餐⋯⋯

毛毛其實好聰明...只係有時好百厭...

向前走、向後走

2018年1月12日(星期五)

早晨呀...今早帶毛毛落街散步...一出大廈門口...毛毛就開始狐叫，原因係喺好遠有位姨姨拉住隻大雪橇狗向毛毛方向行過來。

毛毛開始好衝動搶繩向前衝，我指令毛毛冷靜坐低...當迎面相會一刻...毛毛狂吠對方，雪橇狗就表現貪玩開心...

姨姨強調：唔使驚，我隻狗狗好乖唔咬人咖...唔使怕。

而我回應：我隻狗狗好百厭咖，經常挑戰狗狗同對方打交咖。

當時大家都即時拉實自己隻狗狗，互相打招乎，最後...大家狂笑咁行開...

毛毛本身係乖嘅小朋友...但俾我寵壞咗...唉～

零食嘅魔力

2018年1月11日(星期四)

呢幾日天氣凍...毛毛一直都霸住梳化瞓覺，盡管周圍凍冰冰...都改變不了毛毛貪食嘅個性。

每逢有開膠袋聲響...無論何時何地毛毛就會喺你面前出現，非常神奇...

毛毛趕住出嚟等食零食呢個樣就令家人笑爆咀...

入冬第一次...

2018年1月9日(星期二)

清晨五點幾...一落床就感覺到周圍都凍冰冰...原來氣溫下降到得 7.2 度，連毛毛都凍到選擇賴床唔起身。

帶毛毛去散步，落到街雖然冇落雨...但就感受到好大風而凍嘅感覺比想像更凍。

天氣好凍...毛毛最鍾意走上梳化覺覺豬...

極霸氣嘅毛毛

2018年1月7日(星期日)

今早天灰灰、毛毛雨...帶毛毛落街散步...行過巴士站...

毛毛突然「扎恆馬」搶繩向前標狂吠，原來離遠有隻黑唐狗迎面行緊過來，當黑唐狗見到毛毛咁兇悍嘅表現...就停止繼續向前行...仲慢慢轉向行出馬路避開毛毛繞道行開，當時好彩馬路上冇任何車輛經過...真係好擔心黑唐狗會俾車撞倒...毛毛咁霸道嘅反應唔係第一次...

毛毛變得咁霸道...係細個有次俾３隻黑、白唐狗圍攻受傷有關...

毛毛有點喜歡「肥」

2018年1月4日(星期四)

我家家務助理(肥姐姐)放完長假期...消假返工，咁巧合同我一齊搭𨋢上屋企，我哋去到大門口已經聽到毛毛開心狂吠狐叫...

入屋之後...毛毛狂跑、跳、企...有啲失控...咁係歡迎家務助理(肥姐姐)返屋企，令我好意外...更令我有啲啲吃醋。

我估毛毛對肥姐姐有情意結...回想當年毛毛BB嗰陣...好痛錫同照顧毛毛起居飲食嗰位家務助理係位「肥姐姐」。

毛毛腰椎病復發嗰陣...肥姐姐餵食餵湯咁照顧毛毛...難怪毛毛鍾意肥姐姐。