要堅持，還是…放棄

2018年2月7日(星期三)

臺北渣打公益馬拉松2018，呢場賽事對我嚟講係好特別.....

自從舊年三月(腰部)、五月(頸部)兩次受傷後，一直到今都在接受連串艱苦嘅物理治療，同時間又進行循序漸進式嘅體能操練，花咗半年時間先慢慢咁適應節奏。到出戰2017年終「聯賽第四回合除夕跑」及「銀馬」隻腳膝關節都出現痛感…令我非常擔心。

到臺北比賽前…雖然「與傷共存」但我從未想過放棄，有前輩提供策略...重要一環係唔好受傷...建議我穩穩陣陣配速咁跑，實情係"傷患"不明朗因素難以控制...但我決心要完成賽事。

比賽前一晚難以入睡，凌晨三點已經醒咗，當日非常緊張…去到上線時間又同隊友失散，起跑時感到好孤獨…開跑3K…5K…右膝開始出現痛感跟著左膝…擔心嘅事發生了，當時還能應付7K…8K前面係斜路，呢段斜路令我崩潰，雙腳痛感加劇…流淚了......

我只有放慢步速熬...一直到看見終點拱門，衝線前 300米遇到一組視障跑手跑過身邊，大聲呼叫鼓勵我繼續加油...仲同我擊掌支持作為激勵(我兩行眼淚一直不斷咁流)，終於跑過終點了…感恩。

 今次係我跑路上一次激動嘅經驗...期待下一屆...有緣再會...

---

2017明愛慈善跑⋯試跑（6k）...長跑準備

2017年10月8日（星期日）

明愛慈善跑，喺澳門大學橫琴校園舉行，賽道係混合咗街道、小橋同小巷形式⋯環境非常優美。

本會（魂跑團）有好多隊友參加支持，我自從五月份頸椎受傷後停止晒所有跑步操練，今日參加嘅目的只係想去現場感受一下熱鬧氣氛同一班隊友們見見面敍敍舊，落場慢慢跑一跑平估下康復進度同身體狀況⋯⋯

2017年長跑聯賽第二回合

2017年5月7日(星期日）

凌晨5點⋯開始落大雨，之後一直至9點都落住毛毛細雨。

長跑聯賽第二回合都喺雨中完成，今次賽事本會（魂跑團）有好多男、女隊友出戰參賽，雖然本土賽同年終嘅國際賽相比⋯無論人數規模都好大分别，但本土賽勝在個個跑手都熟口熟面氣氛親切熱閙...

自己嘅目標係同隊友開心相聚、享受跑嘅過程，講唔上跑一個好時間，但⋯亦都創下自己嘅新紀錄⋯本會（魂跑團）中最後一名衝線⋯⋯

賽前大合照

各位隊友都完成比賽

隊中女將...位位都跑得快過我...

包尾了...多得全體隊友幫我打氣...多謝、感動。

以上相片鳴謝Dickson師兄幫手攝影

魂跑團⋯五一輕鬆跑

2017年5月1日（星期一）

現代人為生活忙碌，將興趣同操練都放埋一邊，有缘能夠集合各位隊友一齊享受輕鬆跑嘅樂趣係一件開心嘅事。

5月1號由團長召集同帶領各隊員到松山環山輕鬆跑(5k～7k)，全隊約二十幾人，陣容龐大，隊員著住整齊嘅隊服穿疏人羣之中，引起衆人關注⋯⋯

大合照

完成了環松山跑３圈，隊友們露出滿足同高興嘅心情

隊中亦有女將，而且位位都係高手，曾到世界各地參加比賽...

腰傷後第12日

2017年3月21日（星期二）

腰部傷痛係最難搞嘅問題，因為平日駕駛、搬運、工作都受到極大影響。雖然見過幾位醫生，但康復進度緩慢⋯令我無奈。

醫生建議：宜家唔好搬重嘢住，你平日唔好坐咁耐、唔好企咁耐、最好瞓喺度......

即係話...瞓定定喺度、乜都唔使做。咁即係等於...廢柴...

今早嘅慢慢援跑...都令腰部刺痛...

差點有家歸不得

2017年3月11日（星期六）

上星期日，話說⋯今朝凌晨出去跑步嗰陣⋯大意攞錯咗車匙當屋企鎖匙出門，當我發覺時我已經關咗門，我即時想起有後備匙人⋯太太去咗旅行，咁早又搵唔到工人姐姐，咁⋯即係冇人可以幫手開門⋯毛毛未食早餐、未落街散步⋯心開始急。

想咗好耐先想起有套後備俾咗阿妹，而阿妹為咗方便就放咗喺架車度⋯咁最後就解決咗問題⋯⋯

減輕痛楚的輕鬆跑跑

2017年3月5日（星期日）

過去嘅一星期因工作令身體非常勞累，盡管休息都補給唔到。由其係昨晚⋯腰、腳、膝蓋⋯酸痛難當瞓得好差⋯全晚因痛楚醒咗三次最後一次係凌晨四點三十分⋯之後都冇辦法再瞓得番，咁⋯唯有起床裝身出門去⋯跑跑。

有朋友好關心我咁問我：你咁勞累⋯仲去跑步？實情有証明顯示輕鬆運動係會令肌肉某程度上減輕痛楚咖⋯⋯

冷風...令人心景平靜...

工作時大意令膝蓋受傷...今朝跑步時痛到我拐吓拐吓...

沈校長的一番説話

2017年3月2日（星期四）

沈校長：跑步改變了我的人生觀，跑步鍛練係孤單嘅旅途。

訓練期間⋯係要承受住疼痛、孤獨同失敗，冇人會願意冬天清早六點幾離開暖暖嘅被竇起床跑步⋯經常披風沐雨，但「我不能放棄」。

但⋯鍛練令我堅毅不屈，無懼困難，呢個先係人生嘅重要一課...（資料來自香港中文大學沈祖堯校長綱誌）

沈校長講出我心底話...好多人都未必會明白，亦都未必了解，但好開心沈校長都係跑路上同道中人...

如果你都想改變自已嘅人生觀...請你加入"跑"嘅行列，享受疼痛、孤單...嘅鍛鍊

跑⋯路上的另類驚喜

2017年2月22日（星期三）

過去⋯一直操練嘅地點都係氹仔單車俓，除咗偶然有太太陪伴之外⋯都係一個人跑。

今日跑路上遇上家務助理陪契媽散步⋯令我意外及驚喜，冇聽過契媽講佢經常到單車俓散步...

令我意外嘅係⋯契媽講佢次都行畢單車俓（6 公里 ，大約萬幾步）...

令我驚喜開心嘅係契媽有精神同體力能應付到，咁⋯即係健康同狀態都非常好。

令我感動嘅⋯係契媽無微嘅關心：阿慶，你唔好咁搏呀，你頂唔頂得順呀？身體緊要，小心身體呀！

長輩嘅關心只係簡單嘅幾句話...令我感動暖心...

當期時會反問自己...自己對長輩會唔會咁有心？

我跑⋯在風雨中

2017年2月9日（星期四）

凌晨五點幾⋯⋯

喺樓下熱完身⋯就向住氹仔單車徑方向跑，跑咗 1K 就開始落雨，初初嗰 4K 都係微微細雨，跟著越來越大雨，於是決定跑返屋企，啲雨大到令我全身濕透⋯⋯

我跑經巴士站⋯啲人指指點點用奇怪嘅眼光望實我⋯感覺上：落咁大雨仲跑嗰個儍佬變落湯雞囉。

嗰種眼神令我相信係話我⋯我係癲佬。

跑...係一種信念...

累了！要讓身體休息吓！

2017年2月6日（星期一）

近期由於放長假⋯每日都進行操練，已經持續三星期了，身體亦開始作出投訴⋯警告我過度操練身體就會誇了，要好好休息，別讓身體不舒服。

現在自己醒覺了⋯唔再係後生仔嗰陣時嘅狀態，人年紀大咗⋯身體肌能、新陳代謝、活動能力、耐力、反應⋯⋯都走下波，唔可以唔接受⋯⋯我老了。

好好休息先能夠繼續操練...

跑、跑、跑⋯

2017年2月3日（星期五）

1月中⋯⋯老闆開始俾我放年假，過去嘅3星期⋯雖然有天氣影響⋯但我都冇停止到操練（踩單車、跑步），好耐都冇試過咁嘅情況⋯滿足，多謝老闆。

好多朋友都問我⋯點解你咁鍾意跑步同運動呢？...我答：我唔知。

實情係⋯一種感覺，或者係一種追求，又或者係遺傳⋯父親係運動健將係短跑好手，我身邊嘅幾位表哥都係運動愛好者，業表哥係健身同單車手，禮表哥係赤腳跑手，強表哥玩中國武術⋯我細細個就喺運動氣氛濃厚嘅環境成長，咁⋯我鍾意運動應該係理所當然⋯⋯

跑步為我帶來心情愉快嘅感覺...

而另一種效果就係...攰同痛，但呢種感覺會令人心思思

參加聯賽

2017年1月29日（星期日）

有朋友提議我參加聯賽⋯但路程會長啲 (全程約 7 K )。

我一直都堅持一個信念就係⋯「操練唔係為咗比賽」而係為咗更遠嘅目標⋯「身體健康」...

專家建議人年紀越大越要做運動，運動會令肌肉同骨骼都強化，等身體機能有力量，更能令身體衰老得慢啲，而現今社會資訊科技發達嘅年代，樣樣都話靠科學，所以年紀大嘅人士對於運動操練意識越來越薄弱⋯⋯

健康無價...好多人都知，但好少人重視...

長跑準備...2015澳門銀河娛樂國際馬拉松

20年12月5日（星期六）

一年一度體育界盛事銀河娛樂馬拉松⋯明天清晨六點開。

今年雖然增加咗名額到八千名⋯但都係好難報名，賽道大會安排跑經「澳門世遺」，今年要面對惡劣天氣⋯落雨同低溫，呢種環境對跑手係一個挑戰，今年我同太太一齊報名參加⋯我哋已經準備好接受挑戰⋯

今日排隊攞號碼布同晶片帶非常順利...

長跑準備...我賽前最後一次練習

2015年12月3日（星期四）

今日進行一次輕鬆嘅練習(拉根、鬆弛肌肉)，過去嘅幾個月因工程工作關係十分透支體力（花好多時間休息），所以平日減少操練⋯主要集中操練踩單車（練氣），來緊嘅星期日就係銀河娛樂國際馬拉松比賽嘅日子⋯我會盡最大能力完成比賽⋯享受跑步嘅樂趣。

同我密不可分嘅拍檔...戰鞋

長跑準備...5K慢跑

2015年2月21日（星期六）大年初三

過去兩個幾月嘅趕工程，其中又腳踭受傷⋯令今年跑步操練遲遲都未能展開。

年假休息之後開始第一課嘅跑步操練，今早天氣好差仲落緊毛毛雨，雖然落雨⋯今早都能完成5K慢跑⋯但後半路程腳踭開始隱隱作痛，擔心嘅係腳踭係唔係受咗內傷呢？

毛爸：今早天氣...大霧又毛毛雨...

毛爸：今朝狀態好好全身濕透...應該係雨水同汗水都有...

一場令人興奮嘅迷你馬拉松賽事

2014年12月7日（星期日）

凌晨三點半就起床梳洗裝身⋯準備向運動埸出發，毛毛亦都起床送我哋出門。

落到街車同人比平日嘅多，全部都向同一個方向運動場前進，大家都趕住喺4:30前到達會場報道，未去到起跑點已經遇上千人，而幾千人聚集同一個地方有同一樣嘅目標而非常齊心，大家都磨拳擦掌準備起跑，身處人群中感覺情緒高漲，興奮激動⋯

毛爸：起跑點前人山人海，大家都好心急...等出發。

毛爸：大會領跑車同交通警察己經準備起步。

毛爸：太太揸機起跑前攝。

毛爸：開始喇！開始喇！

毛爸：大會設備非常先進...運動員一過終點...就有臨時成績...極快...要勁讚。

今年目標係...為太太打氣陪太太一齊跑完全程，太太仲破咗自己紀錄（快咗 3 分鐘）。

自己非常享受過程，亦都破咗最慢紀錄，但感覺圓滿...下年再見...

2014澳門銀河娛樂國際馬拉松

2014年12月6日(星期六)

每年一度…國際級長跑運動「澳門銀河娛樂國際馬拉松」明天(12月7日) 早上五點盛大舉行。

今年三項賽事共6000個名額報名都非常緊張…大會開始接受報名只係一天…就己經全部額滿，當日我同太太都報唔到名，幸好有朋友幫忙將我同太太份表格編排為後補名單…等咗一個月…又好幸運哋能夠成功報到名，我當然好開心…更高興嘅係今年太太都報名參加，我己經準備好全力以赴…明天見…

國際馬拉松盛事...即使你有實力同能力都未必報到名參加...

今年我同太太都能夠參賽...雙重驚喜...

復操

2014年10月28日（星期二）

前排連日加班開工到深夜⋯踩單車同慢跑操練都停咗，除咗影響自己狀態之外連太太都陪我停止操練。

呢排唔使再夜工所有又可以同太太一齊繼續操練⋯咁⋯梗係由踩單車開始，辛苦嘅操練係為咗⋯要令身體適應不斷重複話動嘅節奏，増強肌肉組織承受能力，減少受傷嘅機會⋯享受比賽嘅過程。

毛爸：好身休息、勤力操練...

長跑準備...積極操練

2014年10月12日（星期日）

唔知幾時開始⋯太太愛上急行同慢跑（龜速），每隔一日嘅清早或者星期五、六嘅夜晚⋯都去中央公園或者氹仔單車徑急行45分鐘。

遲啲我同太太都一齊參加年尾舉行嘅「2014國際銀河娛樂馬拉松」其中嘅「迷你馬拉松4.2公里」賽事，而噚晚同太太一齊去咗單車徑開始做賽前準備⋯積極操練⋯

 

毛爸：今晚由呢度開始..

毛毛：毛爸、毛媽泊住拖咁一齊咗去，我又俾爸爸媽媽賣甩咗...慘...

 

毛爸：今晚個月亮橙色...好靚...