十五個月大嘅小狄狄

2019年3月12日(星期二)

時間飛快……狄狄喺毛家生活咗一年，過去十二個月狄狄由周圍大小便、對食物抗拒(食種種嘅糧都嘔)、冇安全感、過渡活躍……種種行為上嘅問題到現在都成為過去。

狄狄現時識去指定地方便便尿尿(唔使一定要落街) 、飲食正常(冇再嘔吐) 、每日期待落街散步(早、晚共行約３公里)…小狄狄雖然仲有同毛毛哥爭玩具玩、愛跳躍、愛咬毛媽嘅衫褲、對家人非常熱情(由其係工人姐姐)……但整體生活、行為、習慣…都有好大嘅進步，我自己就希望狄狄能夠保留番活潑、破壞皇嘅個性。

小狄狄好百厭...但非常可愛

狄狄：哈佬喂

２018年10月31日（星期三）

每年嘅萬聖節我都會幫毛毛裝扮，影一輯鬼怪嘅相應節。

今年比較特別⋯攝影器材壞晒，電腦又壞咗、照顧狄狄仔好忙分唔到身⋯⋯所以冇做仼何應節嘅事，以上嘅事都係借口，實情係忘記咗。

至於真係特別嘅事就係狄狄第一年同我哋一齊過萬聖節，狄狄小朋友唔使裝扮已經係似隻魔鬼⋯⋯萬聖節快樂呀！

狄狄：哈佬喂！祝大家萬聖節快樂呀！

狄狄最喜歡嘅玩具

2018年10月21日（星期日）

狄狄呢個小朋友好有個性，家人將玩具（波波、木棒、繩索⋯）放喺一個籃，每日一到玩玩具時間就將一籃玩具俾毛、狄兩兄弟自己選擇玩具玩。

細心觀察就發現狄狄每次都會攞個「咇咇波」嚟玩，真係有啲奇怪（狄狄，你係唔係咁鍾意個波波？），可能狄狄鍾意咬波波嗰陣發出嘅⋯咇咇聲，但就產生一個好煩嘅問題⋯除左玩嗰陣咇咇聲好嘈之外個波波只可以玩一個星期就會壞咗冇聲出，狄狄就會唔玩，平均每星期我都買一個新嘅「咇咇波」俾狄狄玩⋯每個四十大元。

狄狄：嘩～啲聲好正...咇咇咇

狄狄小朋友 10個月大喇！

2018年10月7日(星期日)

喺家人特別關注同特別照顧之下⋯狄狄小朋友今日已經十個月大，托賴狄狄健健康康咁成長。

狄狄行為個性同毛毛相比⋯狄狄係嗰㮔「超級破壞皇」同「超級大少爺」，平日經常挑食同要餵食、同毛哥哥爭玩具玩同打交、經常咬爛放喺椅上啲衣服、喜歡跳起咬人Patpat.......

雖然係咁⋯但好奇怪家人同工人都好照顧狄狄，我自己好難理解⋯⋯。

狄狄小朋友...要開心成長呀！

狄狄轉食脫水生肉糧

2018年５月1日(星期二)

狄狄回家第三日～2018年3月3日(星期六)今日要做義工幫彿光中心元宵節活動做影相佬，全日都開工...難免對小朋友們掛心。

觀察咗兩日...狄狄對新環境充滿好奇，怕孤獨、活躍又要同毛毛大哥哥玩，但毛毛就覺得狄狄好煩經常狐吠警告佢。狄狄返嚟屋企第二日就開始轉糧，有啲擔心狄狄會唔會唔習慣？我雖然全日都外勤但都想抽時間返屋企照顧毛毛、狄狄，今日一直忙到傍晚(代我照顧毛毛、狄狄嘅工人姐姐因為要慶祝生日而提早放工，令我更擔心)，幸好得到督導、師兄、師姐們體諒可以早啲走。

返到屋企啱啱趕及工人姐姐收工，小朋友們見到我就開心狂吠，抱狄狄到騎樓便便同尿尿...狄狄已經識喺尿板方便，但便便同尿尿都好少，算正常，有可能受新糧影響...轉糧希望狄狄腸胃盡快適應...

狄狄：我毛爸去咗邊？

愛跳嘅狄狄

2018年4月11日（星期三）

狄狄有自己嘅圍欄活動地區（120cm 長X 120cm闊 X 60cm高），狄狄每到興奮、激動就會立定跳，高度幾乎跳出欄外，而且係不停咁跳⋯指令及恐嚇都不能制止佢嘅行為，其實令家人最擔心嘅係狄狄會令自己受傷，現在用最消極嘅方法狄狄一失控就送佢入籠⋯困籠。

狄狄困籠先會冷靜少少...呢個小朋友難搞。

帶狄狄落街

2018年3月31日（星期六）

呢幾日都帶狄狄落街睇驗同見識，熟習周圍環境，唔知點解狄狄對嘈雜嘅街道無興趣，仲有啲恐懼感，喺屋企樓下大堂將狄狄放繩自由行嘅情況，咁佢就玩得好開心。當上繩⋯情況就完全唔同，狄狄會周身唔自然仲唔識點行⋯⋯

對嘈雜環境聲好驚青嘅狄狄小朋友...

行為失控嘅狄狄

2018年3月22日(星期四)

2018年3月2日(星期五)今日有工程要開工，今朝狄狄要暫時隔離喺廚房，臨出門要餵狄狄食餐同飲水...要做嘅事太多，在準備不足嘅情況下又趕住返工......要等到中午放飯時間先返得屋企餵狄狄。

到屋企門口只係準備開門...入面毛毛同狄狄已經興奮狂吠(大家互相鬥大聲)，一入屋...先抱毛毛、獎勵，再抱狄狄、獎勵，毛毛就好開心好自覺咁走出騎樓尿尿(叻仔)，我入廚房準備餐...狄狄就行近廚房門口跟住回頭望實我...噢～太遲了...狄狄就地尿尿咗。

當時令我手忙腳亂，要備餐又要搞衛生，我分神忙緊嘅時候...狄狄就玩失縱？我又忙住周圍揾佢。原來狄狄走咗去隔離洗手間便便，我喺門口望到咁嘅情況都呆咗，唉～又要搞衛生喇。到我冷靜落嚟...想下想下...發覺狄狄好神奇同聰明...識得去洗手間便便.....好搞笑。

狄狄係醒目嘅小朋友...

真係擺個靚堆...

我毛家新成員⋯余狄狄(迪迪)

2018年3月21日(星期三)

2018年3月1日（星期四）重要日子⋯下午...

我親自到朋友家接毛家新成員「余狄狄」。

現時狄狄三個月大黑色男仔，排行第三，喺兄弟中算係弱者，個性⋯怕事、細膽、文靜、聰明⋯返到毛家狄狄對新環境非常害怕，加上大哥哥毛毛施下馬威⋯狄狄只有瞓喺枱底角落遠離毛毛，一直到晚飯時間...毛毛嘅反應只係對黑嘛嘛嘅狄狄產生好奇。

雖然過咗半日受驚嘅狄狄連口喝都唔敢去飲水，可憐。傍晚⋯我用手餵水餵糧好彩狄狄還願意合作接受，到瞓覺⋯又係另一個問題，由於要同毛毛隔離，狄狄要臨時瞓喺洗手間，呢個小朋友安靜到令我哋擔心⋯一直到凌晨四點，我終於忍唔住過去睇狄狄，狄狄小朋友坐喺門口用渴望嘅眼光望實我，主動問我攞野食、玩玩具，自己行去門口邊便便同尿尿⋯⋯狄狄咁嘅行為係好開始，加油呀小朋友...

狄狄：大家好，我個名叫余狄狄，男仔，三個月大...