不如意的事......

2019年11月12日（星期二）

長輩經常講人生短暫...經歷好事壞事各半，但好多人都認為「不如意事十常八九」...

而有好多時呢啲不如意嘅事自己好難面對...

願上天賜給我一顆平靜的心，去接受我不能改變的事實....

也賜給我勇氣，去改變我可以改變的事情...

我最希望上天能夠賜給我智慧，去判斷兩者的不同...

鼻哥滲血（平壓練習）

2019年11月8月日（星期五）

十月尾到台中潛立方旅館做「自由潛水」課程練習。

男教練曾經個別指導我練習Frenzel（法蘭玆）平壓方法，雖然我明白過中要點...但未能完全掌握。
由於我勤力密密練習令鼻哥充血滲出血水......所以暫時要停一停了...

家人都有意見了...話我過度勤力練習

我期待已久的新搭檔

2019年4月8日（星期一）

日本體育用品跑界名品牌「美津濃」好耐之前我已經認識呢個牌子，年輕嗰陣一直都好想擁有一對喺前輩口中所講嘅「Run bird」美津濃跑鞋，無奈當時（80年代初）只有大百貨公司先有得賣價錢仲係一般人付擔唔起......

一直到自己出來社會工作，自己有能力⋯⋯就將美津濃跑鞋成為自己跑道上嘅搭檔⋯⋯

皇速３

日本版

2019長跑聯賽第一回合

2019年3月17日（星期日）

本地長跑聯賽開鑼⋯過去由二月份開始就斷斷續續感冒、小病⋯令自己引發其他健康問題而不能操練，第一回合雖然只有7.9K但跑得非常非常吃力，結論係⋯身體未能完全回復狀態、練習不足⋯⋯

鳴謝師兄Benny Chan攝影師

家裏沒有寵物（狗狗）的人不會明白

2019年3月14日（星期四）

有冇朋友有咁嘅經驗呢？⋯⋯
自己感冒發燒病了全身肌肉痠痛情緒低落非常之唔舒服⋯而家人要上班⋯剩低你一個人十分孤單（期間為被免傳染同滋擾家人我搬出大廳瞓），到深夜你狂咳嗽到瞓唔著又怕嘈醒家人，但⋯你不停嘅狂咳令家人驚醒之外⋯更對你有意見，使自己好內究。
呢啲係我過去三個幾星期面對嘅問題，呢段時間只有毛、狄兄弟陪伴我，好難相信呢段時間毛、狄兄弟突然間生性乖咗，兩兄弟夜晚一齊出廳陪我瞓，唔介意我咳到嘈住佢哋瞓、唔介意我壓住佢哋瞓(夜晚我去廁所兄弟都跟出跟入)，唔明白點解佢哋會變成咁，好多謝毛、狄兄弟⋯⋯難怪全家人一直都咁愛錫毛、狄兄弟。

好可愛嘅毛、狄兄弟

2018聯賽第三回合

2018年10月21日（星期日）

每年本地四個回合嘅聯賽又係老友、隊友相敍嘅盛會，今個回合自己嘅表現實在令人咀喪⋯賽事途中因右腳不斷出現「抽根」而放棄比賽，非常感謝中途兩位交通警員嘅幫忙...十分感激，棄權了⋯⋯真係一個艱難嘅決定。

 唯有留侍下一個回再戰⋯⋯

我家毛、狄少爺開餐

2018年10月16日（星期二）

每日下晝到傍晚⋯家傭姐姐都會花時間準備好食材煮餐俾兩位少爺仔食，由於家人、毛毛、狄狄、幾乎同一時間開飯，所以一到開飯家傭姐姐就忙到不得了，招呼兩位少爺開餐、飲肉湯、同少爺們抹咀清潔、收食兜搞衛生、又準備幫手家人開飯（由其係冬天氣溫冷啲飯餸好易凍晒，要掌握好時間）⋯位家傭少啲實戰經驗都做得唔好，雖然自己應負呢啲場面係冇難度⋯講真都幾吃力。

毛、狄兩兄弟嘅晚餐...肉、雜菜、肉湯、生果、維他命丸...

睇真啲原來好多野要準備...家傭姐姐掂。

踩單車～自炒車

2018年10月14日（星期日）

今朝一早出氹仔單車徑踩單車，當回程嘅時候⋯

喺氹仔澳大附小同消防局嘅十字路口，一輛打咗轉左指輝燈嘅私家車行到街口慢駛⋯而該私家車冇轉彎繼續向前行，當時咁突然嘅改變我為閃避該車摌向行人路撞上石級⋯炒車。

今次意外令我架單車腳踏彎曲變形、電話（手機）顯示版面爆碎、右邊膝關節對下內側壓傷腫脹，雖然有損失好彩人就冇大外。

自己駕駛車輛或踩單車都時時刻刻提醒自己"注意安全"，宜家咁睇⋯就算自己幾小心都難保別人大意⋯⋯

生日快樂

2018年10月12日（星期五）

簡單嘅早、午、晚餐...全日慢活，原來簡單是幸福⋯⋯

今日由凌晨開始就收到親友、老友、朋友、老闆、隊友⋯傳來嘅生日祝福，實在令我感覺窩心、感動、感恩。

多謝大家嘅祝福，我祝願大家身體健康、事事順心、幸福喜樂⋯⋯

多謝你哋嘅陪伴，我愛你哋...

澳門明愛慈善跑2018

2018年10月9日（星期二）

明愛慈善跑已經完滿結束，現場氣氛令人興奮、開心、激動⋯⋯，賽事除左係做善事幫助有需要嘅人之外仲係大家好友相聚嘅好機會，每次我出席各大賽事重點都係見一見好耐無見嘅前輩、同隊友一齊吹水、同老友一齊談心、同朋友一齊打卡影相⋯而呢種相遇嘅緣份係難得，好期待下一個賽事。

各位老友、隊友⋯⋯下次再見。

中秋節2018

2018年9月24日（星期一）

一年容易又中秋......

祝大家…人月兩團圓、快樂幸福、豐衣足食、中秋節快樂！

今年可以話又驚又喜嘅一年， “驚”嘅係超級颱風「山竹」吹襲，幸運哋大家平安。

“喜”嘅係余家添多一名外孫女「Q-Bo」、亦都添多一名家庭成員「狄狄」、能夠同三表姐、四表姐、雪女相見…….

毛毛代表毛家祝各位中秋節快樂！

端午節2018

2018年6月18日（星期一）

祝大家端午節快樂！

心中一直都有兒時嘅深刻記憶「端午節」即係有烚雞蛋食同有得去海灘玩水，細個嗰陣媽媽經常咁講：有雞蛋食係幸福嘅事，寓意衣食無憂，去海邊玩水，寓意洗浄心靈去除病魔。今時今日同大家咁講會覺得有啲古怪，無論係點長輩都係希望家人幸福健康咁成長⋯⋯端午節快樂！

毛毛：好野，今日有雞蛋食

無品嘅大叔

2018年5月12日（星期六）

實情係咁⋯⋯毛毛習慣喺天橋底下街口轉角位便便，由於天橋上落位置所以人來人往。

今日下午毛毛喺同一位置便便完轉身⋯時間嘅巧合有位大叔喺街角出現行過毛毛身邊⋯與毛毛相遇，咁突然嘅情況令毛毛受驚自然反應咁衝向大叔狂吠（毛毛有上狗帶，而且同大叔冇任何身體接觸），大叔只係俾毛毛吠叫而嚇到跳開兩步。

當時我即刻制止毛毛吠叫同時第一時間向大叔道歉：對唔住對唔住，唔好意思對唔住。

但大叔反應好嬲好火爆⋯雖然冇損傷亦都好唔份氣同好無奈，行開嘅時候向我回敬一句＂我 X（吊）X（九）你呀！你 X（老）X（味）丫⋯＂...

只係一件人狗吳會嘅小事啫，嗰位大叔認真小氣冇教養同無品⋯⋯

毛毛：毛爸話嗰位大叔教壞細路...叫我仟其唔好學佢...

母親節 2018

2018年5月13日(星期日)

今日係「母親節」。

祝天下偉大嘅媽媽...身體健康、事事順心、母親節快樂！

唔知點解細個嗰陣係咁諗...媽媽一定要煮我鍾意食嘅餸俾我食、一定要買玩具俾我玩、我返學一定要俾零用錢...咁係理所當然嘅事。

但當自己慢慢成長同有自己兒女之後...先感受到媽媽無私嘅愛心、耐性、犧牲...一直承受住嗰種無止境嘅壓力，唔係一般人可以做到。

每逢「母親節」就特別思念媽媽...

(借用偶像黃家駒嘅歌詞)再次泛起心裏無數的思念，已往片刻歡笑仍掛在臉上，願您此刻可會知是我衷心的說聲 ......想念您。

媽媽我愛您，母親節快樂！

狗狗行為訓練及生活分享會

2018年5月6日（星期日）

噚日我同太太一齊參加咗由「毛孩守護舍」聯合其他單位喺聖若瑟大學舉辦嘅「狗狗行為訓練及生活分享會」，重量級導師有～由美國專業認可訓犬師Sunny Sir及專業寵物美容師Fei Fei 主講、示範有關狗狗行為及寵物美容資識，更即場為大家解答問題。

今次分享會近百人參加，場面非常熱鬧，自己獲益良多，除咗溫固知新之外更開心嘅係能夠見番一班老友，Sunny Sir、大介媽、格格家長⋯⋯

今次參加為支持「毛孩守護舍」大介媽...

訓犬師Sunny Sir係我認識多年嘅老友亦都係毛毛嘅行為訓練導師

多謝Sunny Sir帶俾毛毛嘅禮物...

毛毛：風乾青口...正，多謝Sunny Sir...

我上學去⋯從新學習

2018年4月20日（星期五）

細個嗰陣⋯爸爸經常對我講：萬般皆下品 ，惟有讀書高。當時我唔明爸爸嘅意思，出到社會做事先發覺知識對事業係非常重要。

今時今日有學習支助，當時間許可又遇心怡學科（犬隻訓練及行為矯正課程）咁⋯就去報名⋯返學。我哋嘅課堂導師包Sir 為人健談風趣又係一位出色嘅犬隻訓練師。

呢個課程共有10名學生，大家都係愛狗狗同愛動物人士，我上課嘅目的係溫固知新，希望了解及掌握更多對狗狗嘅行為理解、照顧、訓練⋯等嘅新知識，應用喺毛毛、狄狄身上，令佢哋日常更健康、更快樂、更有規律咁開心生活⋯⋯

從拾做學生嘅感覺......累。

狄狄：我陪毛爸返學呀！

2018聯賽第一回合

2018年3月25日(星期日)

2018年3月18日(星期日)過去嘅 3 星期...因為屋企來咗一名新家庭成員 (余狄狄)要照顧而非常忙碌，所以除咗物理治療操練之外...所有體能操、踩單車、跑步練習...都暫停。

今日聯賽第一回合，路程跑 10 k，自己由於近日梳於練習對完成賽事都欠缺信心。

比賽開始...當跑到 3 k...右腳就開始抽筋...勁痛...跑道上邊行邊跑，經過身邊嘅隊友、對手、工作人員不斷為我打氣加油，實在好唔容易跑完全程，路程上心中不斷出現成千成百個放棄借口...腳抽筋好痛、右膝關節痛、操練不足、睡眠不足......等等，但我還是堅持到最後...衝線嗰一刻...更得到旁邊一位外籍女士幫我一把一齊過終點...

多謝攝影師

多謝所有為我打氣嘅隊友，由其係團長 JOE

我再踏上羽毛球運動場

2018年3月22日（星期四）

今日早要去做物理治療操練，經過羽毛球場⋯我停留旁邊場地做泳前熱身，場中有兩男兩女(混雙)在雙打，其中一名男高手（三哥）熱情邀請讓我一齊落場熱身試打羽毛球。

實情⋯自從6年前打羽毛球令右邊膊頭受傷後一直都冇信心從拾羽毛球拍，今次一試結果令我滿意⋯⋯係時候從返羽毛球場。

羽毛球係我其中一項最愛嘅運動...

太太，生日快樂呀！

2018年2月16日(星期五)

今日係大年初一又係太太生日嘅日子。

首先同太太拜年，祝願太太身體健康、龍馬精神、如意吉祥、萬事勝意...恭喜。

今年冇幫太太特別慶生，連生日禮物都欠奉...實在覺得自己嚴重失職同過份(但我一定會補送)...

祝太太 (心兒)生日快樂、事事順心...我愛妳。

心兒，生日快樂、心想事成...

毛毛：媽咪，生日快樂呀！

2018情人節大餐

2018年2月14日(星期三)

今日本應準備好禮物同親自下廚...但處處不順...附近所有ATM都冇錢提，挑選嘅禮物冇現貨...最後只有準備簡單而太太鍾意嘅餸菜、甜品、水果...一齊共度結婚週年同情人節...

節日快樂！