單車日誌…儲蓄能量

2014年2月7日（星期五）

呢一倫都係有限度咁踩單車⋯每隔12小時至18小時踩一次每次20公里（正常平日一次踩30至40公里）。

如果你係熱愛運動嘅人會知「能量」同「狀態」係要勤力操練返嚟，當你停咗一段長時間運動⋯要回復「狀態」⋯咁⋯你嘅操練就非常辛苦。

毛爸 : 如果啲「能量」好似消防栓咁...能夠儲起就好喇...

毛爸 : 努力、勤力咁操練先至係最實際...

生日快樂，大年初七

2014年2月6日(星期四)

恭喜！恭喜！祝各位，生日快樂、身體健康、心想事成…

今日係農曆大年初七傳統係叫「人日」，今日大家見面都會互相祝賀大家…生日快樂…

細路仔嗰陣…今日媽媽會一早起身烚雞蛋俾我哋食…當時生日先有雞蛋食(當時物資缺乏屋企又好窮)，有蛋食係好難得嘅事…感覺好幸福。

毛爸 : 祝各位 ...生﹔日快樂、身體健康、豐衣足食...恭喜！

令我覺得出奇嘅⋯毛毛行為表現

2014年2月5日（星期三）

噚日朝⋯我送完太太返工⋯返屋企，咦～點解屋內面冇任何動靜嘅⋯開門⋯點解唔見毛毛歡迎我？毛毛去咗邊？...

我入到廳發現成地都係抹手紙⋯而毛毛就好嚴肅咁坐喺度望實我，睇嚟係毛毛做成咖喎⋯而且好似知道自己做錯事咁（同我眼神接觸毛毛表現好驚），既然肯認錯⋯咁就要⋯獎勵啦。

成件事睇冇乜特別，但對於毛毛小朋友嚟講表現勇敢...

毛毛 : 毛爸，對...對對...唔...住...

毛爸 : 毛毛今次好叻...知錯...

馬到功成，大年初六

2014年2月5日（星期三）

恭喜！恭喜！祝各位：龍馬精神、馬到功成、馬上行運、馬年順境⋯

今年甲午馬年，今日大年初六又係「馬日」，凡有關馬嘅⋯人、事、物都當旺，生肖屬馬嘅朋友就要把握時機喇。

祝各位：新春大吉、萬事勝意

毛爸 : 祝各位喺馬年 " 好心態、好姿態、好狀態..." 恭喜...恭喜...

財神到，接財神呀！大年初五

2014年2月4日（星期二）

恭喜！恭喜！祝各位：財星高照、金銀滿屋、財源廣進、年年有餘⋯

我哋中國人習俗由唐代開始「大年初五」係送走「窮神」接「財神」嘅日子...

記得細個嗰陣同隔籬鄰舍成班細路仔喺新年呢幾日⋯攞住張用毛筆寫咗「財神」嘅紅紙⋯去街頭街尾周圍拍人哋嘅門嗌「財神到」接財神呀！咁豆利是，好熱鬧開心。

今時今日大家千其唔好亂咁拍人哋嘅門⋯三唔識七⋯人哋會報警拉你咖⋯

毛爸 : 財神到呀！接財神呀！

毛爸 : 祝各位...斬斷窮根、馬上發達...

毛媽整餅開工大吉

2014年2月3日（星期一）

今日廚房超忙⋯除咗我煮三餐之外⋯太太今日整紫糬麵包、朱古力蛋糕、鴨肉乾⋯我梗係要幫手啦，仲做咗得力「廚房助理」添。

今日喺廚房好開心咁忙咗一日⋯準備整餅、整肉乾、整包材料、煲湯、煮餐、煮飯⋯最後清潔用具器材⋯返工都未有咁忙...

今日仲被封為「最佳廚房助理」⋯唉～應該係「最佳阿四」先啱⋯開工大吉呀！

毛爸 : 毛媽發功...全家有口福...開工大吉、豐衣足食...

單車日誌…存里數

2014年2月2日（星期日）

我聽醫生建議⋯若要運動要做啲唔使用力嗰種⋯仲唔可以過量。

有好多「金牌教練」都會建議用「存里數」嘅方法，就係⋯如果你每日你要踩單車40公里，你可以計劃一日內分兩次踩（每次踩20公里）。呢個方法對我嚟講好啱用⋯今日我完成40公里，但令我心煩嘅係⋯面對仲未復原嘅傷勢…

毛爸 : 踩咗入去濕地...要抬返部車出馬路...

毛爸 : 清晨...好大霧呀 ~