迎春花

2013年2月6日(星期三)

尋日朝帶毛毛散完步啱啱入門口…就聽到太太講 : 肥仔你睇啲水仙花開喇…幾靚…又會咁早開嘅？咁…未過年就開晒啲花攞。
今朝經過花檔就請教花婆點解，當我發問嘅時候…格離左右啲師奶你一句我一句咁講 : 天氣回暖呀！啲花曬太陽就好快開喇、照燈都好快開花咖…等等。
花婆就笑咪咪咁答我 : 阿哥哥今年早立春呀，我留俾你嗰啲係迎春花…立咗春就會開花咖喇…你放心有成個星期開咖…新正頭花開富貴呀哥哥…哈哈哈。

毛爸 : 開喇開喇...啲花又靚又香...

毛爸 : 水仙花...家人至愛...

毛爸 : 呢啲好似叫鐵海棠...啲花雙層咖...好得意...

毛爸 : 吾知乜嘢花...新年先有...啲花好細朵...但開得好耐...


毛爸 : 紅色...鴻運當頭呀...

封「利是」

2013年2月5日(星二)

細個開始到現在(幾十年)過農曆年嘅特別任務「封利是」都係我執行，亦都睇驗咗一啲人心態嘅轉變。
細個嗰陣嘅想法…「利是」係要去「荳」嘅，而且要纏住對方唔放，希望封利是係「軟野」(即係紙幣)…。
大個咗嘅想法…「利是」幾錢係唔重要，希望對方主動派利是，接到封利是…即係話喺對方心目中肯定你全年表現達標，重視你嘅價值…

毛爸 : 小朋友見到一定好開心...全部軟野...

澳大利亞帶返黎嘅手信

2013年2月3日(星期日)

今晚出門食團年飯嗰陣…收到好友蘭茜嘅來電…話有份手信喺澳洲帶番嚟俾我哋，係呢度先多謝蘭茜咁有心。
由威廉同詠琪親自攞去食店交俾我，份手信係格熱手套、格熱布同神奇藥膏…詠琪仲即場講解藥膏嘅用法同功效。
我接過份手信就即時有種 “暖暖在心”嘅神奇感覺…唔知點解(可能係內心友情感性作怪)，再次多謝蘭茜同威廉喺咁遠帶番嚟俾我哋嘅手信…多謝！

Peter : 精緻嘅禮物令人愛

毛毛心聲…大意毛爸細心毛媽

2013年2月3日(星期日)

今朝毛爸同平日一樣帶我落街散步，今早好大風仲有少少凍…毛爸真係大意冇幫我著衫就落街…好彩我頂得順。
旁晚媽咪帶我去散步…落街之前媽咪出騎樓左望右望又申手出窗口試吓氣温，結果係要著雨褸…媽咪話外面雨粉粉喎，落到街只不過地下濕濕…媽咪妳過份細心啦！

毛毛 : 媽咪件雨褸係我bb嗰陣咖喎...宜家迫爆了...

歡迎歡送到攰晒

2013年2月3日(星期日)

尋日雖然放假但十分忙…一早就要出門買餸、約保險經紀傾保單、辦年貨、整年糕、幫彿堂收貨、去訂狗糧、公司尾牙食晚飯、接送外甥…忙咗全日辛苦過返工 。
由於我哋全日都多次又出門又返屋企…連毛毛都忙到癲…又要開心咁歡迎、失望咁歡送…到最後毛毛只係坐喺梳化嗰搖吓尾求其咁迎接我哋就算…

毛毛 : 媽咪毛爸你哋仲使唔使出去呀？留番喺屋企陪我丫...我好攰呀~

新年花燈「蛇」

2013年2月1日(星期五)

好多好多人對 「蛇」呢樣動物有一種莫名其妙嘅驚怕，而呢種充滿 神秘、兇猛、冷血嘅爬蟲，自古以來就有無數關於佢哋種種奇怪嘅傳說。
古埃及人視「蛇」係權力象徵，皇族嘅頭冠係用蛇做裝飾，古中國民間傳奇有人蛇戀嘅古事「白蛇傳」，中華文族更加用「蛇」做十二生肖嘅瑞獸…睇嚟普羅大眾對「蛇」又愛又怕。
今時今日啲設計師將「蛇」嘅型象變成可愛嘅做型…會令某啲人對蛇嘅睇法有所改觀。

毛爸 : 做形可愛嘅卡通蛇仔...


毛爸 : 大型嘅傳統花燈...

失眠症

2013年2月1日(星期五)

膊頭痛一直都困繞住我…前日零晨因為瞓瞓吓要轉身觸動手患痛醒再瞓唔番… “失眠”了。
大部份嘅人都唔會面對 “失眠”嘅問題(我係其中一人)，佢哋唔相信夜晚瞓落張勁舒服又暖粒粒嘅床係會瞓唔着(我一直都係咁諗)，直到我膊頭受傷，因劇痛而經常失眠(醫生有開安眠藥俾我不時之需，但我怕上引…冇食)...
宜家我感受到 “失眠”係幾咁辛苦…

毛爸 : 執齊 "架生"出去影相...

毛爸 : 好彩有影相打發晒啲時間...

毛爸 : 為免嘈醒屋企人熟睡....流連到天光先返屋企...